Velkomen til mitt digitale arkiv over kart og vegval!

Tenkjer at både H60- og AK-open er for lange for ein rusten kropp, og veljer B-open, noko som var eit heilt greitt val :-)

start - 1.: Eg lar meg ikkje forvirre av ein overraskande plassert startpost, og blir klassevinnar på strekket til 1.

1. - 2.: Rullegardina går ned, eg tenkjer at dette er enkelt, og prøver å halde større fart enn det kroppen eigentleg orkar austover mot 2., som eg hugsar at eg var på dagen før, utan spesielle utfordringar. Konsekvensen er at eg drar langt forbi posten, før eg forstår flausa... 5 minutt kasta ut av vindauget :-(

2. - 3.: Styrar mot det opne området, og kjem for langt til høgre, det går nok fort eit halvminutt her...

3. - 4.: Tenkjer at eg må skjerpe meg, og redusere fartsambisjonane, og følge med på kartet, og har som konsekvens av dette grei kontroll bortover.

4. - 6.: Trur eg veljer rett, med å styre via sti på begge strekka.

6. - mål: OK, men sliten, og veldig nøgd med at eg valde B-open framfor ei lengre løype :-)

Var skeptisk på førehand, om eg kom til å greie å lese kartet, eller om kurvebiletet kom til å forsvinne i svart, men eg fann greitt fram, om ikkje via heilt optimale traséar på ein steinbotn som ikkje passar meg som hand i hanske.

Eg er veldig bevisst på å lese kart undervegs, ut frå teorien om at om ein bommar her, så er det ikkje lett å ta seg inn...

start - 3.: Går klokkereint på kurs, samstundes som eg les kart.

3. - 4.: Brukar bekken som assistent.

4. - 5.: Styrar innom gult hjørne og myra midtvegs, og les meg greitt inn via skrentar og anna.

5. - 7.: Kompass, samstundes som eg les kart.

7. - 9.: Kompass, med kontroll via vassdammar.

9. - 11.: Sklir meg nedover på steinete mose, med god kontroll på kvar eg er.

11. - mål: Sliten, men godt nøgd med meg sjølv :-)

Betre fart i kroppen enn på lenge, og eg slår dei eg skal slå :-)

Heldig med løpsveret, då eg kom meg rundt mellom skikkelege regnskyll både før og etter mine minutt i skogen.

start - 1.: OK, men løper "baklengs" ut gjennom starten, som var rigga til for utløp nordover.

1. - 2.: OK

2. - 3.: Uvanleg nok strekkvinnar, og ingen grunn til å klage på traséen eg finn :-)

3. - 4.: Strekktidene tilseier at eg ikkje fann beste trasé her, eg måtte smårunde både myrhol og nedfall...

4. - 7.: OK

7. - 8.: Gjer ein "rar" feil litt før midtvegs, der eg utan no i ettertid å ha klart for meg kvifor, svingar inn på sti til høgre, men stoppar og korrigerar etter nokre meter. Inn mot posten sikrar eg bevisst med inngang via blokkfeltet. Det er ikkje eit område på Fløien der eg har bomma så mykje som akkurat her...

8. - 9.: OK, men gjer den tabba ikkje også å lese kvar eg skal vidare...

9. - 10.: Er ikkje på forskot, og startar austover mot stien ved Revurtjern, utan å ha lese strekket. Eg ser etter kvart at eg burde ha vald høgre, men er då kome så langt at eg fortsetjer, og bestemmer meg for ein sikksakkvariant, for å få mest mogleg løping nedover på veg. Stien til venstre veit eg er håplaus å løpe på (, og eg gjekk jo opp der så seint som på veg til start). Mystisk nok ser strekktidplasseringa mi meir enn OK ut, men eg er overtydd om at høgre er vesentleg raskare. Truleg er forklaringa at det også er mange andre som har vald feil her, utan å sjå "stor høgre"?

10. - mål: Her blir eg fråløpt, ja...

Alltid kjekt å løpe ved Totræna, sjølv om formen er dårleg, og det blei meir oppover i dag enn det eg ønskjer meg.

O-teknisk går det relativt greitt, sjølv om eg slit med "blasst" kart, og det er ein del eg ikkje ser på kartet.

start - 5.: OK, men tungt i motbakkane, ja...

5. - 6.: Eg har merka meg postbeskrivelsen, og rundar til høgre for å få ein betre trasé opp. Når eg er oppe, er det ingen post på topp av skrenten, og eg går til og med så langt fram at eg ser ned til botn av skrenten, der eg heller ikkje ser nokon post. Eg diskuterar med Emil Heksem, og konkluderar med at vi er på rett stad. Eg orkar ikkje å leite, og drar vidare, medan Emil klatrar ned for å starte leitinga.

6. - 7.: Blir passert av Emil, som forteljer at han fann posten ved ein skrent lengre nede.

7. - 8.: Føler at det er veldig langt bort til posten...

8. - 9.: OK, sjølv om opprinneleg tanke var meir rett på, men eg orkar ikkje å klatre meir...

9. - 10.: Eg tek sjansen på at posten heng eit stykke under skrenten, og rundar til venstre. Tabbe...

10. - mål: OK

Ope klubbmeisterskap med poengorientering, enno utan resultatliste.

Tidsramma er 45 minutt, og eg konkluderar med at det ikkje er noko poeng å bruke tid på 1- og 2-poengarar som eg ikkje likevel passerar forbi, og tenkjer vidare at når det er lagt postar ute i hogstfeltet ved Gymmelandsvegen, må dette bety at hogstfeltet er meir løpbart enn det var sist eg var ute i det. Eg veljer dermed Henneåsen mot klokka, der tanken er å avslutte gjennom hogstfeltet med 153, 154 og 151.

I den augneblinken eg tek av frå lysløypa, kjenner eg at kroppen er enda mindre glad i høge kneløft enn det eg frykta, og åsen er alt anna enn lett å ferdast i, og det går treigt.

135 er eg så sløv at eg passerar på nedsida, og plutseleg orienterar eg mot 133, utan å hugse at eg på vegen dit skulle innom 135, og blir klar over flausa for seint til at eg vil snu... 3 poeng ut av vindauget...

Traséen eg finn ned mot 128 er mildt sagt dårleg, og over hogstfeltet mot 153 blir det ikkje betre, og på 154 går det opp for meg at eg truleg har for lite tid att.

Ut frå 151 er eg sikker på at eg har for lite tid att, og roar difor ned, ikkje noko poeng å ta knekken på beina bortover lysløypa, for så å kome inn på 45:45 eller noko slikt...

Fasit null poeng, og ein tung, men god treningstur, og alltid kjekt å kome i mål til dusj i Fanahytten :-)

Grei gjennomføring, diverre 2 sek. for seint til å slå Tommy Sævareid...

start - 4.: OK

4. - 5.: Myra inn mot posten er uventa tung, og eg trur det er kjappare anten å ta den lavare myra til venstre, eller å følge skiløypa lengre.

5. - 6.: Ser på fleire vegval her, herunder venstre via arena, men eg vil ikkje gjennom der, nei. Eg trur valet mitt via sti til høgre er heilt OK. Ut frå posten er det er i alle fall betre å krysse elva "på direkten", enn å dra innom brua.

6. - 7.: OK

7. - 8.: OK, bortsett frå inngangen. Anten skal eg tidlegare over i "riktig" myr, eller så skal eg følge skiløypa litt til før eg tek ut til høgre.

8. - 9.: Vegvalet er nok OK, men her går det treigt, ja...

9. - 10.: Pressar meg gjennom det grøne...

10. - 11.: OK

11. - 12.: Litt forvirra midtvegs på strekket, då eg føler sprik mellom kart og terreng, men det handlar jo eigentleg berre om å kome seg opp på ryggen...

12. - mål: OK

Kjende allereie på veg opp frå haldeplassen på Kokstadflaten at dette kom til å bli tungt, og tungt blei det. Det var nok også Askøymyrene frå dagen før som sat i beina...

start - 1.: Overraska over ikkje å finne tråkk. "Hovudtråkket" ligg truleg lengre til venstre. Generelt er det i "ryddeområdet" her ein del "slep" som ikkje framgår av kartet, og som gjer det vanskeleg å finne beste trase.

1. - 2.: Slit tungt bortover myrene, og finn heller ingen optimal trase. Beste trase er nok til venstre for min variant, men eg vil fortast mogleg ut av helvetesmyra midtvegs...

2. - 3.: Orkar ikkje meir myr, og veljer bort høgre, som truleg er best. I staden veljer eg venstre, og så finn eg undervegs ut at eg skal kutte. Deretter kuttar eg feil (meininga er å liggje til venstre for og om lag parallelt med streken, men absolutt ikkje å dra på tvers av denne), og så blir det rikeleg med myr likevel... UFF...

3. - 4.: OK

4. - 5.: Endeleg eit strekk der det delvis er fast botn :-)

5. - 6.: OK

6. - 7.: Drar ned for tidleg, og finn til og med ei nase, men forstår kva eg har gjort og tek meg inn, men det går nok eit minutt...

7. - mål: OK, men strekktidene forteljer klart at eg ikkje har dagen fartsmessig...

Fleire vegval med forbetringspotensiale, men elles greitt gjennomført i terreng som var tyngre enn kva eg hugsar det som frå tidlegare.

start - 1.: Hadde venta ei tydelegare myr, og tok av litt for seint frå "startstien".

1. - 2.: OK

2. - 3.: Føler at vegvalet er feil, og at eg bør bruke meir sti til høgre?

3. - 4.: Finn ei av øyas verste kvistrøyser under kraftlinja, elles OK.

4. - 5.: Tenkjer først rett på, men etter å ha kome inn på ein overraskande fin sti, blir det høgre i staden, og først etter å ha starta på dette, ser eg det truleg kjappare venstrevegvalet.

5. - 6.: Sklir litt ut til venstre, men veit at posten skal vere til høgre for meg.

6. - 7.: OK

7. - 8.: Fleire hevdar at dei fann eit OK tråkk bortover her, det gjorde ikkje eg... Skulle eg ha løpt strekket om att, ville valet ha vore stor venstresving på sti.

8. - 9.: OK

9. - 10.: Slepp meg ei myr for langt ned, men korrigerar greitt.

10. - mål: OK

Grei gjennomføring, og så er det fortsatt stort potensiale fartsmessig.

start - 1.: OK, bortsett frå at eg slår hovudet oppi ei trestamme på veg opp mot posten, med resultat blod både her og der.

1. - 3.: OK

3. - 4.: Trur eg veljer rett vegval, men slurvar i inngangen.

4. - 5.: Undervegs føler eg at botnen er så dårleg at svakt venstre hadde vore betre, men strekktidene er vanskelegare å tolke?

5. - 7.: OK

7. - 8.: På dette strekket gjer eg eigentleg ei kjempetabbe, men med flaks går det likevel bra. På slutten av strekket les eg eigentleg neste strekk, samstundes som eg ligg pent i venstre myrkant, og blir plutseleg overraska over ein post som dukkar opp, til og med med den koden eg skal ha :-) Sånn kan ein også finne fram :-)

8. - 9.: Går meg fast i nedfall i det grønstripa inn mot posten.

9. - mål: Her må kartet lesast også mot mål, ja...

Dette terrenget blir aldri noko favoritterreng, men eg brukar å finne greitt fram, men i dag blei det 3 minutt tidstap til post 4.

start - 1.: OK, men mogleg at høgre er hårfint kjappare?

1. - 2.: Tungt oppover, ja...

2. - 3.: Vurderar venstre som kjappast, samstundes som eg ikkje vil ha meir klatring, og difor heller drar bortover dårlege/utydelege skrålistiar. Strekkplasseringa er god, og vegvalet var kanskje betre enn eg trudde?
Samstundes var det nok fleire som fekk ein ekstra bom her, pga ein "lureskjerm" litt nedanfor posten?

3. - 4.: Dagens flause, der eg ligg for lavt ut frå posten, og strategien: "Inn på nord-sør-sti, litt nedover denne, og så ut sti til høgre", kollapsar, og eg drar alt for langt nedover før eg skjønner flausa, og legg ein ny plan, som ikkje er veldig god.
3 minutt tidstap her, ift om eg hadde klart å gjennomføre etter opprinneleg plan.
I etterpåklokskap går det sjølvsagt an å seie at eg skulle ha stoppa for å lese kartet då eg kom inn på nord-sør-stien, men eg hadde kanskje litt for stort fokus på å løpe frå ei D50- som eg hadde nådd att på 3., med den konsekvensen at vedkommande D50- var langt framom meg på 4.

4. - 5.: Her handlar det primært om å kome seg uskadd ned.

5. - 6.: Endeleg eit flatt strekk med OK underlag, og det går så fort at eg nesten løper forbi posten...

6. - 7.: OK

7. - 8.: OK, utan at eg forstår særleg av kartet her...

8. - mål: OK

Valde B-løypa i dag, og med fasiten i hand, var det korrekt val. A-løypa hadde blitt i tyngste laget.

start - 3.: OK

3. - 4.: OK, og eg er altså rimeleg sikker på at venstre over toppen er kjappast.

4. - 6.: OK, sjølv om eg diverre er i ferd med å velte ein annan løpar som eg er i ferd med å passere då eg snublar i myra ned mot 6.

6. - 7.: Føler at eg har kontroll, men lav sol inn frå høgre gjer det veldig avgrensa kva eg ser til høgre for meg, og då løper eg inn mot feil skrent 10 meter for lavt, og skjønner deretter null og niks. Her går det treogeithalvt minutt, tenkjer eg :-(
Rett og slett sløvt å gi frå meg høgde ut frå 6., utan å kompensere midtvegs, og her går det heller ikkje an å skylde på sola, men gjort er gjort...

7. - 8.: Beste variant er nok å dra rett opp på stien, sjølv om denne er dårleg.

8. - 9.: Har veldig grei kontroll til like før posten, som eg heldigvis har sett på lang avstand, for inn mot posten skjønner eg null og niks av kartet. No etterpå ser eg kvifor, og det er at i dette området har ein vesentleg del av det brune flytta på seg, med totalt kaos som resultat for ein kurvelesar som meg.

9. - 10.: Skjønner null og niks av kartet, som eg jo i ettertid forstår har heilt feil kurvesystem her, men finn etter ein minuttbom, der eg også er innom ein annan post, den posten eg skal ha. Eg trur han ligg rett, men utfordringa er at kurvesystemet fram til og aust for posten ikkje stemmer (det er i eit område her 4-5 høgdekurver som har flytta seg ca. 40 meter sørover, og delvis lagt seg oppå anna kurvenett, samstundes som i alle fall noko myr i delar av det same området også har flytta på seg).

10. - 11.: Fortsatt feil kurvesystem m.m., men eg kjem meg ned, etter å ha tryna undervegs, då eg hektar i ein stålstreng frå det gamle gjerdet.

11. - mål: OK

Tilbake i H60-A bedrift for første gong sidan 2023.

start - 1.: Kuttar gjennom veldig tett skog ned frå åsen, her kunne nok fargen ha vore grønare.

1. - 4.: OK, og føler at dette går veldig greitt :-)

4. - 5.: Det har kanskje gått litt for glatt, og eg blir litt for "grov" inn mot posten, der eg tek av "ein kolle for tidleg" i siste opne myr. Fortsetjer deretter for langt før eg forstår at noko er veldig feil, og brukar i overkant lang tid på å ta meg inn att. Her går det 4 sure minutt :-(

5. - 6.: Veldig nølande bortover her, men går greitt i posten.

6. - 7.: OK

7. - 8.: Det eg gjer, følast feil, men strekktidene forteljer noko anna...

8. - 10.: Diverre ingen strekktider å samanlikne med her, men eg trur vegvala er OK. Ned mot 9. trur eg at eg skal få hjelp frå vatnet, men det får eg ikkje, og kjem for langt til høgre...

10. - 11.: Vegvalet mitt blir nok litt for langt... Stussar då eg kjem inn mot posten, og ser skrenten, men ikkje skjerm eller bukk, men dei er der...

11. - mål: OK

Det er sanneleg ikkje kvar dag ein kan stille på start i løp der ein av funksjonærane har 85-årsdag, samstundes som dottera er løpsleiar og sonen er løypeleggar... Tidlegare orienteringskretsleiar Per Haugland meinte sjølv at det var ein veldig høveleg bruk av dagen ❤

Det gjekk tungt og treigt i regnet, men eg finn jo fram :-)

start - 4.: OK, etter å ha funne ut av forvirringa med at post 1 ved både første og andre augekast ser ut til å vere nummerert som post 4...

4. - 5.: Veldig tungt oppover på siste del av strekket...

5. - 6.: Beste trasé er truleg svakt til høgre for streken?

6. - 7.: Den smale myra er mindre løpbar enn forventa, og det er kanskje betre å dra rett på?

7. - 8.: Planen her er enkel: Gi litt høgde bortover skrålia, sjå deretter etter "rusttårnet", og ta posten derifrå ("rusttårnet" er merka med "T" sør for postringen, og er ein særs tydeleg detalj).

8. - 9.: OK

9. - mål: Dårleg sti, og veldig varsam nedover til 10.

Onsdagsettermiddagstur til Samnanger i fineveret, og så er det jo ikkje kvar dag ein kan løpe i "nytt" terreng, for eigen del har eg faktisk aldri løpt på denne delen av kartet :-)

start - 1.: Skjønner at her må ein finlese for å få med seg alle skrentane på kartet...

1. - 5.: OK

5. - 6.: Opprinneleg plan er å kutte over det gule, men når eg ser høgde og konsistens på gjerdet, blir det i staden rundt til høgre. Usikker inn mot posten, men blir fanga opp av Per Arne Aadland på bomtur :-)

6. - 7.: Skeivar ut og ned til høgre her :-( Planen var rett på...

7. - 8.: Planen er nok ein gong rett på, men når eg ser kor bratt det er ned frå posten, konkluderar eg med at eg ikkje skal ned der. Prøver meg først litt opp til venstre, der eg konkluderar med at det er enno verre, før eg drar sørover, der eg overraskande nok finn "hol i stupet" etter ikkje så mange meter. Klatrar bratt ned her, og så blir det høgre, med klatring opp att, i staden for opprinneleg plan.
I ettertid lurar eg på om stor venstresving faktisk er beste vegval?

8. - 9.: Ny utskeiving til høgre, og blir fanga opp av post 11...

9. - 10.: OK

10. - 11.: Får ikkje kartet til å stemme inn mot posten, og sleivar litt til høgre, sjølv om eg var der berre nokre minutt tidlegare...

11. - mål: OK

Sleit tungt i Stordskogen i dag, men får trøyste meg med at eg blei beste Gularløpar i klassen...

start - 1.: Har grei kontroll gjennom grumsete skog, men finn ingen post i myra der posten skal vere. Eg diskuterar litt med Magnus Natås, og sjekkar så steinen nord for ringen før retur til korrekt detalj, og konkluderar med at alt stemmer, men så ropar Per Vold: "Her er den".
Posten ligg i austre kant av ringen :-(
2 min. tidstap?

1. - 2.: OK, men miserabel fart.

2. - 3.: Betre fart her, men det er mogleg at det er kjappare gjennom det lysegrøne like til høgre for streken?

3. - 4.: Veljer feil trasé, forvekslar deretter 2 myrer, og går på ein skikkeleg bom, med full stopp, kart- og terrenglesing og mykje undring. Etter å ha tatt meg inn, og meiner at eg ser korrekt høgdepunkt, er neste utfordring at eg ikkje ser den godt gøymde postskjermen...
Totalt trur eg det går om lag 4 minutt her :-(

4. - 5.: OK

5. - 6.: Myra inn mot posten er langt tyngre enn eg trudde at ho skulle vere, og eg burde ha følgd stien lengre, før eg forlot denne...

6. - 7.: Klarar å finne den verste braken her, og blir passert av fleire som finn ein betre trasé 15-20 meter til høgre for meg...

7. - 8.: OK

8. - 9.: Blir strekkvinnar til ein ufint plassert post, i ymist vegetasjonsgrums.

9. - 10.: Eg mistenkjer at det gule ikkje er gult, og kjempar meg ut på stien til høgre. OK val, men dårleg gjennomført vidare. Her ryk nok eit minutt...

10. - mål: OK

Opna pokalkampsesongen frå haug til haug i Ytrebygda i dag, utan store flauser:

start - 1.: OK

1. - 2.: Eg ser ikkje kota som ligg akkurat under ringen, og forstår ikkje kartet når eg ser ein haug foran meg. Eg klatrar opp på haugen, og forstår då at eg skulle ha gått rundt...

2. - 5.: OK

5. - 6.: Jungel sør for vegen, og på veg gjennom hugsar eg at denne jungelen har eg prøvd meg på før...

6. - 7.: Eg meiner eg veljer ein heilt grei trasé ut frå kartet, men går meg fast i masse nedfall på siste del av strekket. Dagens største tidstap.

7. - 8.: OK

8. - 9.: Mistar stien litt før 9., men tek meg greitt inn.

9. - mål: OK, og langt greiare skog her enn det vi sleit med lengre vest :-)

Kjende på beina ut frå start, at eg hadde tatt ut det meste dagen før, og at det ikkje var snakk om same fart i dag, og må vel eigentleg seie meg nøgd med å kome gjennom på under 10 min/km, etter 4 løp på 71 timar, og før det meir enn 4 månadar sidan førre løp. Glatt og sleipt, men ikkje like ille som dagen før, men skoa blei veldig tunge av klabbar etter kvart... Eg trur det eg hadde med meg på slutten, med all leira, veide nærare 100 kg...

start - 1.: OK, og hugsa frå dagen før at det var mindre ille å løpe parallelt med motorsykkelspora, enn å løpe i dei...

1. - 2.: Såg ein post på lang avstand, som eg følte kanskje var for langt til høgre, og det var han, men eg skjønte med ein gong kvar eg var... Eg hadde jo også vore der dagen før :-)

2. - mål: Konkluderte med at dette er terreng eg i tempo som i dag beherskar greitt, og at dagens utfordring ikkje var å finne fram, men å halde sånn nokon lunde tempo. Veldig sliten på slutten, og sleit nok også med inspirasjon i gjørma mot 17... Ingen spesielle utfordringar O-teknisk, og håper det er meir koter og mindre gjørme/leire neste gong eg skal løpe i Portugal...

"Langsprint" på blautt underlag, som kladdar, og der det sklir alle vegar, og der løysinga er rett på (evt. med litt "styringshjelp"), med mindre det er mørk grønt som står i vegen.

O-teknisk tilnærma prikkfritt, men eg blir jo fråløpt, men eg skal ikkje klage når eg kjem gjennom på 8 min/km på så pass tungløpt underlag.

Tunge bein, og eit par bommar, men karrar meg gjennom og inn i beste 1/2. Greitt nok, slik inngangen til løpa var.

start - 1.: Forstår ikkje skogen eg ser ned mot posten, og går på ein sving. Skulle eg ha repetert strekket, hadde eg følgd vegen lengre før eg tok av til høgre.

1. - 2.: OK

2. - 3.: Eg meiner eg veljer rett ut frå kartet, men løpbarheita i det gule der eg "kuttar" langs ein dal tidleg på strekket er langt dårlegare enn forventa. Bekkane eg kryssar må "klatrast" :-(

3. - 5.: OK, men meir rett på til 4. er nok kjappare.

5. - 6.: Eg meiner eg veljer rett, men går meg fast i jungel opp mot posten.

6. - 7.: Har grei kontroll til eg er oppe på flata, men deretter forstår eg null og niks. Det kryr av stiar og spor, og i staden for å forhalde meg til resten, brukar eg tid på å prøve å skjønne kva som har skjedd, og først seinare skjønner eg at feilen er at det er masse som manglar på kartet... Her går det kanskje 2 minutt?

7. - 11.: OK

11. - 12.: Planen er å følge vegen lengre, men eg tek av til venstre på noko eg trur er stien eg skal inn på, og når eg skjønner feilen, er eg kome så langt at eg fortsetjer rett på, truleg utan vesentleg tidstap.

12. - 13.: Rett på er nok kjappare enn Z?

13. - mål: OK

Akkurat inne i beste 1/3, og greitt nøgd med meg sjølv i det som var første løpet på over 4 månadar :-)

start - 4.: OK

4. - 5.: Sånne strekk er vel det eg pr. no likar minst, men eg kom meg opp og bort...

diamanten: Litt nøling inn mot 6., og beste trasé opp til 9. er eit knepp lengre til venstre, elles OK

11. - 12.: OK

12. - 13.: Har først tenkt høgre på sti, men det ser så greitt ut ut frå 12., at eg tek rett på

13. - 15.: Sklir ut til høgre på begge desse strekka, der planen er rett på, men tek meg greitt inn

15. - mål: OK