Velkommen til mitt digitale arkiv over kart og veivalg!

Guffent ver før start, og verre blei det, med stadig meir regn og lengst i aust også skodde.

start - 1.: Var veldig usikker på korleis terreng med grøne striper var, og det var dårlegare enn forventa. Inn mot posten dukkar det opp masse smådetaljar, og eg klarar ikkje å bli samd med kartet om kva som er høgdepunkt, kva som er steingardar, og kva som er anna.

1. - 2.: OK

2. - 3.: Veljer høgre delvis for å unngå grøne striper, og delvis for å få lese resten av løypa. Eg trur vegvalet er veldig OK.

3. - 4.: Veljer høgre via sti (eg trur valet er OK), men når eg kjem ut av det grøne, slår skodda mot meg, og sjølv om eg er i rett søkk, ser eg ikkje posten, men drar forbi på oppsida. Finn posten ved hjelp av annan løpar som også leita rundt i skodda.

4. - 5.: Er totalforvirra, ser ingen terrengformasjonar i skodda, og får inkje til å stemme før eg endeleg ser lyset ved det grøne NV for posten.

5. - 6.: Finn ut at grøne prikkar ikkje er skjønt, men finn i alle fall fram, samstundes som skodda går sin veg...

6. - 9.: OK, noko skal ein jo ha att for å ha brukt tid tidlegare til å lese løypa :-)

9. - 10.: Skogen midtvegs er tettare enn forventa, og eg endrar plan til å la meg fange opp av det grøne, samstundes som overgangen til mørk grønt er mindre klar enn forventa, men ingen katastrofe. Eg veit når det er stopp i det grøne at eg er for langt til høgre.

10. - mål: OK

Første "skikkelege" løp på Middelhavsturen, men ingen lokale konkurrentar i H65- :-(

Kald vind frå nord, og regn i lufta...

Eg slår dei eg skal slå, og er ikkje langt bak dei 3 andre :-)

start - 1.: Går greitt i godt gøymd post trykt ned i grop langt under normen, og konkluderar med at det kan forventast meir av både "krypande" postar og alt for små objekter.

1. - 2.: OK

2. - 3.: Litt forvirring midtvegs, men ikkje noko stort tidstap.

3. - 4.: Er litt for optimistisk og upresis inn mot posten, og kjem for høgt, men inga katastrofe.

4. - 5.: Får eigentleg lite til å stemme her, men lite tidstap.

5. - 6.: Katastrofestrekk... Eg startar rett, men i staden for å halde høgde etter å ha runda det mørkegrøne, klatrar eg, feilvurderar avstand, og når eg treff stien, er eg mykje lengre aust enn eg skal vere, samstundes som eg fortsetjer på stien alt for langt før eg forstår kva eg har gjort...

6. - 8.: OK

8. - 9.: Eg anar ikkje kva eg ser etter, men finn greitt posten trykt ned i ei smal grøft.

9. - 10.: OK, sjølv om "skrenten" knapt er synleg.

10. - mål: OK, og eg er ein av få som forstår at høgre via veg er best til 12. Dette gir suveren inngang ift dei som veljer inngang frå nedsida, og som ikkje ser skrenten pga tett vegetasjon.

Eg løper pr. no ikkje sprint på hardt underlag, og tok denne løypa som morgontur med innlagte omvegar og fotografering av m.a. soloppgang, og teiknar difor ikkje noko vegval.

Fin by :-)

Utdrag frå resultatlista:
1 Gerardo Garcia 15:15 8006481
2 Jens Kristian Kopland M65 15:53 +0:38 8058780
3 Svein Nygaard M55 16:50 +1:35 8201991
4 Mikko Sani M70 17:29 +2:14 8680049
5 Tom Arild Karlsen M70 17:52 +2:37 8237785
6 Harri Leinikka M50 18:02 +2:47 8275282
7 Are Eriksen M70 18:25 +3:10 8269015
8 Jon Kaarby M65 18:41 +3:26 2500263
9 Per Erik Bjoerklund M65 18:50 +3:35 7881430
10 Unni Strand Karlsen W70 19:17 +4:02 8237750
56 Torgeir Strand M65 44:11 +28:56 8004321

Eg trivast godt i slikt terreng, og gjennomførte veldig greitt :-)

Eg kjente meg veldig tung i steget då eg gjekk av bussen etter ein del timar i denne tidlegare på dagen, og lurte meg ned i ei kortare løype enn det eg eigentleg burde ha løpt. Det var ikkje planen at det skulle ende med løypesiger, men slik blei det...

Resultatlista:
1 Torgeir Strand M65 28:19 8004321
2 Lis Daehli W70 29:03 +0:44 8004299
3 Unni Strand Karlsen W70 29:46 +1:27 8237750
4 Jon roll faerden 30:25 +2:06 8488513
5 Arnulf Villmo M70 31:27 +3:08 7201824
6 Anders Waage M75 31:39 +3:20 8012049
7 Edgar Furuholt M75 31:45 +3:26 8011588
8 Jan Haugland M60 32:14 +3:55 344909
9 Karen Marie Kaarby W65 32:20 +4:01 2500262
10 Finn Morten Aarstad M75 32:35 +4:16 8719109
11 Raili Liimatainen W65 34:29 +6:10 502356
12 Hans Roar Bakken M75 34:34 +6:15 8719010
13 Matti Aronen M55 35:36 +7:17 7080928
14 Oeyvind Egeskog M75 35:39 +7:20 216791
15 Aase Rita Ellingsen W60 36:10 +7:51 334040
16 Minna Aronen W70 38:49 +10:30 7080930
17 Anna-Karin Eklund W60 39:45 +11:26 207502
18 Reidun Fallan Smaavik W65 40:06 +11:47 8111622
19 Hans Stordal M75 41:18 +12:59 2021862
20 Else Stordal W70 41:23 +13:04 1416205
21 Monika Haaberg W70 41:24 +13:05 870930
22 8314148 41:54 +13:35 8314148
23 Rolf Lunde M70 42:35 +14:16 334037
24 Gretel Berntsen 44:35 +16:16 8719078
25 Eli Tufte Hanssen W65 45:52 +17:33 1003765
26 Gunnel mansson Ok Vilse 47:37 +19:18 8330818
27 Nils Olav Vennevik M75 50:03 +21:44 8111650
28 Lisa Annersand W65 53:29 +25:10 8380014
- Erja Raiko W65 FM 7141416
- 8525908 FM 8525908
- Aud Kjemperud W70 FM 334016

Eit veldig spesielt løp, på totalt "ukurant" målestokk, og "lokal" kartnorm, gjennomført umiddelbart etter "det normale" løpet frå same arena.

Kartet er ekstremt detaljert, og det tek meir tid å venje seg til målestokk, enn det eg brukte no.

Konklusjonen til 1. var at her var det berre å ta kurs og løpe, og så dukka posten opp før du hadde kome opp i fart.

Metodikken fungerte greitt t.o.m. 8., men på strekket til 9. kom eg skeivt, og sto brått ved eit gjerde, utan å ane kvar ved gjerdet eg var, og tilvenninga til målestokk var alt for dårleg til at eg klarte å lese meg inn. Surra rundt i meir enn 4 minutt, fann masse andre postar, før eg fann min...

Teiknar ingen vegval, til 9. veit eg ikkje kvar eg var (, men truleg for langt til venstre?), elles handla det om rett på, evt. varsam sving innom "næraste gule"...

Hadde bestemt meg for å ta det med ro, og navigere stødig, og det starta som planlagt, i krevjande terreng.

Inn mot 6. når eg att førstartande Tom A. Karlsen, og skjønner då at her blir det mykje bomming, og at eg truleg ligg veldig godt an (ettertida viser at eg på vedkommande tidspunkt ligg i leiinga i løypa...). Eg blir ivrig, mistar hovudet, og passerar gjennom ringen mange gongar, men utan å sjå posten, noko eg vurderar som utruleg når eg endeleg ser han, og tenkjer at her har eg jo vore fleire gongar tidlegare... :-(

6. - 9.: OK, og sjølvtilliten bygger seg opp att, kanskje kan dette likevel bli veldig bra, eg ser jo at det yrar av totalforvirra løparar rundt meg, i eit terreng som ikkje akkurat er "nordisk", og der normen er tolka heilt annleis enn det vi er van med lengre nord.

9. - 10.: Total katastrofe :-(

10. - 12.: Eg kuttar på farta, og finn greitt fram...

12. - 13.: Eigentleg OK, men eg drar ikkje opp det søkket eg tenkjer å dra opp, rett og slett fordi vegetasjonsopninga som kartet viser skal vere der, ikkje er der. Etter kvart er vi ei gruppe på nærare 10 personar som trålar rundt her, og til slutt drar eg opp det attgrodde søkket eg først hadde tenkt (teikna med gul stripe på kartet), og der er posten. Eg ropar så høgt eg kan til dei som ikkje blei med meg gjennom krattet...

13. - 14.: OK

14. - 15.: Får ikkje tak på stien, men tek meg etter litt forvirring greitt inn.

15. - mål: OK

Eit særs spesielt "løp", der PWT ikkje hadde fått løyve frå lokale myndigheiter til å arrangere. Ordren var: "Sjå ut som turistar", noko som passa meg greitt, eg løper jo likevel ikkje pr. no sprintløp på hardt underlag.

Eg oppførte meg altså som turist, og gjekk både omvegar og knipsa bilete, men ein suveren måte å sjå aktuell del av Monaco på. Mellom postane 13 og 14 tok eg meg til og med ein sving innom Frankrike, for å sjekke ut om det var mogleg enkelt å kome seg inn på Stade Louis II. Det var det ikkje...

Det var inga tidtaking, og ikkje sett ut postutstyr, men nokre av postane var merka med diskrete merkeband.

RF og andre som teljer land, har ei nøtt ift om dette kan reknast som løp eller ikkje, og om Monaco då i tilfelle kan teljast som nytt land :-)

Første løp på Middelhavsturen gjekk ikkje akkurat i silketerreng. Eg følte meg ikkje i slag før start, og bestemte meg for å ta det veldig med ro, og var greitt nøgd med det når eg oppdaga at vegetasjonen fleire stadar handla om stikkebuskejungel.

Mellom 3. og 5. var eg i ei gruppe som dreiv på med "kollektivorientering", med stadige drøftingar om kva det var vi eigentleg såg, Stisystemet på kartet var relativt "rettleiande", og det var ikkje heilt lett å sjå skilnad på "tråkk som er teikna som sti på kartet" og "tråkk som ikkje er med på kartet", og uansett var det vanskeleg å følge tråkk som stadig delte seg, utan at stiane på kartet delte seg tilsvarande. Skrentane var langt under normen, og eg såg heller ingen steinar som var store nok til å vere "normsteinar".

Frå 7. til 8. skjønte eg lite, og eg sjekka klokka mot "brytetida" reiseleiar Jens hadde kringkasta, før eg konkluderte med at her skal eg fullføre.

"Snilt" terreng dukka først opp etter post 16, og her blei det faktisk nokre joggesteg :-)

Undervegs dukka det opp minner frå WOC i 2011, det er fleire stadar i Frankrike det er grumseterreng...

Nydeleg sommarver, og solbrent skalle etterpå... God stemning etter målgang, og full forståing for at land utan allemannsrett må bruke dei terrenga dei har tilgang til :-)

Blei heldigvis slått av nokre kjappe ungdommar, men eg var raskaste veteran over 50...

Eg meiner etter kvart å ha "knekt koden" i dette terrenget, og hadde ingen spesielle problem undervegs, men kartet er ikkje heilt oppdatert på løpbarheit overalt. Inn mot 6. er min variant langt frå nokon innertiar...

Ingen strekktider å samanlikne mot, men eg trur eg gir frå meg litt for mykje høgde mellom 6. og 7.

Med skrantande kropp starta eg nattcupsesongen i B-løypa i måneskin i kveld. Greitt val det, tenkjer eg, og så var faktisk 2. plass godt innan rekkevidde, om eg berre ikkje hadde sølt bort minst 2 minutt rundt post 3...

start - 2.: OK, men ikkje heilt lett å sjå kvar stiane gjennom planteskogen faktisk var...

2. - 3.: Er sløv og upresis inn mot posten, og kjem opp på haugen til høgre, og rotar litt ekstra rundt oppå her, før eg kjem meg ned på rett stad.

3. - 4.: Gløymer kompasset, og drar heilt skeivt ut av 3. :-(
Inn mot 4. forlater eg stien for tidleg, men tidstapet inn her er berre småtteri mot utgangen frå 3. Småirritert på meg sjølv, etter 2 dårlege strekk i terreng eg bør kjenne godt.

4. - 7.: Skjerpar meg, og finn greitt fram, sjølv om eg står fast i grums nokre sekund litt før midtvegs mellom 5. og 6.

7. - 8.: Det er kanskje nokre sekund kjappare ikkje å dra heilt ned på Osvegen?

8. - mål: OK

Ingen av mine "faste" konkurrentar i same løype som meg i dag, og det eg såg rundt meg på fellesstarten, var løparar med vesentleg meir fartspotensiale enn meg. Planen som då blei definert var å navigere stødig rundt utan bom i "god turfart", "full løpsfart" frå start ville truleg vere ei god oppskrift på seinare sprekk...
Gjennomføringa blei som planlagt, og eg såg ingen frå eiga løype etter post 1.

start - 1.: Løpsleiar hadde sladra om at alle hadde same første post, så eg var berre med i køa medan eg las løypa vidare.

1. - 2.: Eg er sikker på at høgre er best, men det finnast fleire ulike høgrevariantar, og eg trur den beste er eit knepp lengre til høgre midtvegs. Det var uventa tungt der eg "løp", med opp til 10 cm nysnø, og ingen spor av at andre før meg hadde tatt same vegval.

2. - 5.: OK

5. - 6.: Veljer feil i starten av strekket, der det beste må vere å halde seg oppe på myrflatene.

6. - 8.: OK

8. - 9.: Kunne nok ha skrådd ned litt tidlegare, men finn ein grei trasé, samstundes som eg tenkjer at både kropp og terreng var lettare for 45 år sidan...

9. - 10.: Er varsam nedover her.

10. - mål: OK, og inkje spurtoppgjer eller nokon som skal forsøkast lurast på siste post i år.

Poengløp, enno utan resultatliste med poeng, men eg trur eg vann eldste klasse. Om eg også blei klubbmeister, står att å sjå, kriteria for dette er ikkje eintydige.

Kart utan meridianar og med fleire stup med fallstrek feil veg var lagt inn som ekstra konkurransefaktorar.

Står stille etter fellesstarten (tidene i Eventor visar ikkje starttider, men "nullingstider") og lurar på kva rute eg skal ta. Eg forkastar postane oppe på åsen sør for Joravatnet, og bestemmer meg for å starte med "bonusbøtta" under Fanasåta, og deretter dra nordaustover, men ikkje lengre enn at eg veit at eg rekk "heim" før maks.tida på 45 minutt er ute.

start - bonusbøtte: OK vegval, men får meg ei overrasking når det eg trur skal vere ein enkel rebus handlar om å finne 8 papirlappar med kvar sin bokstav, for så å setje desse saman til noko med 2 ord. Eg finn 7 papirlappar, gjettar meg ut frå desse fram til orda, og fortsetjer vidare, men det går nokre minutt meir her enn det planen var, før eg visste at "bonusposten" inkluderte lappeleiting...

bonusbøtte - 150: OK

150 - 140: Mykje gras og grums ned her...

140 - 170: OK, men ny overrasking då posten har eit oppslag om ein sjokolade som skal finnast i ein pose, og det einaste eg finn, er ein pose med drops. Eg leitar rundt etter sjokoladen, før eg konkluderar med at det einaste som er her er drops...

170 - 160: OK til eg er mindre enn 10 meter frå posten, og treff som planlagt på eit stup, men som fell feil veg ift kartet. Eg skjønner lite, og fortsetjer, men snur relativt kjapt, då alt anna indikerar at eg er på rett stad. Eg ser skjermen, og konkluderar med at kartet er på trynet akkurat her (og ser no etterpå at det i same område er fleire andre stup med fallstrek feil veg...). Eg skrinlegg samstundes planene om å fortsetje til 161, då det gir risiko for ikkje å rekkje tidsnok tilbake.

160 - 143: Tungt opp til posten, og eg bestemmer meg for å la 142 oppe på Hamresåta vere i fred, og heller sikre at eg kjem tidsnok tilbake.

143 - 151: Nytt tungt strekk, og dummar meg ut då eg skrår opp mot skrenten, for så å oppdage at posten faktisk er plassert nede på myra.

151 - mål: OK, i lav motsol, og tek ikkje sjansen på å ta svingen bortom 135, men når eg kjem i mål med god margin til maks.tida forstår eg at eg burde ha tatt med 142...

Likar meg langt betre på slike kart enn på sprintkartet dagen før, og får seie meg greitt nøgd med å bli beste ikkje-pensjonist :-)

start - 6.: OK

6. - 7.: Styrar etter bustadblokkene, samstundes som eg passar på ikkje å kome for lavt.

7. - 9.: OK

9. - 10.: Kortstrekk der eg blir upresis med retninga, og trur eg er lengre til venstre når stien kjem på tvers. Drar tilbake til stien for å ta meg inn, og finn deretter greitt posten, i ei minimal grop, men halvanna minutt forsvinn...

10. - 12.: OK

12. - 13.: Har grei kontroll, men på høgdepunktet er kun ein skjerm, og ingen bukk. Eg startar å leite etter bukken, før 2 andre løparar kjem til, og vi etter diskusjon konkluderar med at vi er på rett stad, og at vi løper vidare. På veg ut etter kollen sør i ringen roper yngstemann: "Her er posten", så det blir kvittering på oss alle. Om lag minuttet går med her i bukkleiting og rådslaging.

13. - 14.: OK

14. - mål: OK, men tungt å løpe oppover, ja...

Ikkje verdas beste kart, og ein del nyare aktivitetar hadde også endra litt på situasjonen ift kartbiletet, men likt for alle.

start - 1.: Beste vegval er nok faktisk rett sørover frå start, men ikkje lett å sjå dette når alt er lagt til rette for å løpe ut mot aust.

1. - 3.: OK

3. - 4.: Vond motsol, og krasjar nesten med ei jente på trehjulssykkel... Beste "nedløp" trur eg er aust for undergangen?

4. - 5.: Løper gjennom undergangen, før eg forstår at eg ikkje skal den vegen, og snur tilbake... Greitt å kome opp skråninga, og undervegetasjonen som kartet viser, er ikkje der eg klatrar opp.

5. - 9.: OK, og når eg kjem, er starten rigga ned slik at eg unngår dei potensielle "snubleutfordringane" fleire av dei tidlegstartande hadde.

9. - 11.: Forstår lite av stisystemet her.

11. - 12.: OK

12. - 13.: Blir stadig meir usikker på stisystemet, og tek av litt for tidleg, etter noko som liknar på ein kolle...

13. - 14.: OK

14. - 15.: Er på veg forbi posten då eg skjønner at det no går for fort...

15. - 16.: Havnar på feil sti midtvegs, men trur eg er på stien som er på kartet, og blir så fanga opp av ytterlegare nye "frisbeestiar". Det går nok med eit minutt i forvirringa her.

16. - mål: OK, etter å ha konkludert med at her handlar det om å styre etter kompass og kurvebilete, og i hovudsak neglisjere påteikna stiar.

Fuktig, og sleit veldig med å sjå kva eg hadde rundt meg på slutten, men det gjekk bra, om enn med ein del ekstra varsemd nedover.

start - 1.: Veljer feil her, beste løysing må vere til venstre for streken (, og med korrekt vegval her, hadde faktisk klasseseier vore nær...).
Eg går meg også fast i grønt før siste lysløype, då eg var ute i regnet såg kartet kvitt ut her, inne og utan vatn på brilleglasa er det moglegvis lysegrønt, men ikkje lett å sjå skilnad på kvitt og lysegrønt. Tanken var inngang via myra NA for posten, men det var fint tråkk oppe på ryggen, så eg tok det i staden, men vegvalet er rett og slett for langt, eg burde nok ha "kutta" opp til første lysløype ein stad gjennom finskogen til venstre for streken...

1. - 2.: Startar på same tråkket som inn mot 1., og finn deretter ein veldig tung trasé vidare, men er usikker på kvar beste trasé er? Strekktidene forteljer at fleire må ha funne betre botn enn det eg fann opp myra.

2. - 3.: Bestemmer meg for høgre via lysløypa, men fangast opp av eit OK tråkk som eg følger nokre meter før det forsvinn. Får god inngang, og trur vegvalet er korrekt, når det er så tungt i terrenget som no.

3. - 4.: Ser ingen gode alternativ tll stor venstresving, og finn ein grei oppgang frå Grindåsvegen.

4. - 5.: Inn i mørk granskog, og på med leselyset...

5. - 6.: Glatt i hogstfeltet, men trur eg har beste trasé her?

6. - mål: OK, men ser mindre og mindre, og er særs varsam utfor. På 7. ser eg ikkje posten med det same, sjølv om eg står mindre enn 5 meter unna...

Innleiinga på dagen var tung, og tanken var at ettermiddagen skulle gi ein opptur, men...

start - 1.: Myra er så tung at eg trur at det lønar seg å dra rundt på veg.

1. - 2.: Eg veljer venstre via kraftlinja, og med plan om å styre via gjerdet i kanten av det "tomtegrøne". Planen viser seg å vere veldig dårleg, då eg etter ei stund, og heilt utan å ha passert noko gjerde, er inne mellom fleire granhekkar som er så tydelege at det er uforståeleg at dei ikkje er på kartet. Brått går det opp for meg at her har eg vore før, og det er jo nettopp inne i det "tomtegrøne"... Eg kjem meg ut, opp til posten, tek ei tenkepause, og konkluderar med disk., og at slik dagen har vore og veka ser ut til å bli, tek eg resten av løypa som treningstur.

2. - 3.: Opp bakken konkluderar eg med at treningsturen blir rusletur. Myra midtvegs er f.ø. like våt som sist eg passerte over ho.

3. - 4.: OK

4. - 5.: Konsentrasjonen er ikkje på topp, og det blir ein litan sving inn i posten.

5. - 6.: OK

6. - 7.: Rett på over haugen er nok betre enn min jungelvariant, men eg er litt nysgjerrig på "det tomtegrøne", og må innrømme ei viss forvirring ift å sjå kvar den klare grensa er.

7. - mål: Eg ruslar meg inn utan å stemple, og tidtakar konkluderar med "brutt", sjølv om eg eigentleg hadde sikta meg inn på "disk.", etter å ha vore i forbode område til 2., og på resultatlista blei det visst "disk." likevel.

Bakken opp frå bussnuplassen ved Starefossen var uventa tung, og med tilbod om 1:5.000 i B-løypa (1:7.500 i A), valde eg den. Eit greitt val i dag :-)

start - 2.: OK

2. - 3.: Finn ingen god trasé bortover her. Det er mogleg det beste er å dra ned med det same?

3. - 5.: Vil helst ikkje velje vegval med mykje vegløping, men eg ser ikkje gode alternativ

5. - 6.: OK

6. - 7.: Er veldig i stuss i starten av strekket, når eg har lese at eg skal til eit høgdepunkt som eg ikkje finn på kartet, og brukar litt tid før eg startar løpinga på vegen. Deretter tek eg av vegen for tidleg, og får ein litan sving inn mot posten. Med optimal gjennomføring av dette strekket hadde det faktisk blitt klasseseier, men heller ikkje klassevinnaren har optimal gjennomføring her.

7. - 8.: Det er nok kjappare å løpe lengre på vegen, og inn til venstre der gjerdet sluttar. Eg vurderte også høgre via HGriegs veg, men trur det er treigare?

8. - mål: Blir parkert nedover her, men det er rett og slett fordi eg vil vere og er forsiktig.

Logistikken gjekk ikkje heilt opp, det blei start ein time seinare enn tenkt i regn og tungt skydekke, og gubben hadde ikkje med lykt med leselys.

start - 1.: OK, men starten var nok lengre sør enn på kartet.

1. - 3.: OK, men tenkjer allereie her at det i dag kan bli trøbbel med å sjå skilnad på ulike strek...

3. - 4.: Kjem litt for langt til venstre mot ein litt "rar" post. Eg får ikkje tak på kvar skrenten eigentleg er...

4. - 5.: OK

5. - 6.: Får ikkje kartet til å stemme, men går greitt i posten...

6. - 7.: Strekktidene indikerar at eg har idealvegvalet.

7. - 8.: Skjønner lite bortover her, og posten kjem noko overraskande på, utan at eg ser snev av søkk der posten faktisk heng. Han heng kanskje litt for langt vest?

8. - 9.: OK

9. - 10.: Klarer å få til ein 10 sek. bom, sjølv om eg har vore på posten før, og no med inngang som bør vere kopi av utgangen...

10. - 11.: Slit med å sjå kva som er kva bortover her, kartet følast å vere i svart-kvitt. Eg meiner også der og då at posten ligg for langt sør, men når eg no teiknar vegval, trur eg at posten ligg rett, og at det er det grøne på kartet som forvirrar, og som ikkje stemmer med det vi ser i terrenget. Mistar eit minutt her, men er fortsatt merkeleg nok på 2. plass i klassa.

11. - 12.: Virrar vidare i skumringslyset, søler bort 2 minutt, og 2. plassen i klassa er borte vekk...

12. - 13.: Nok ein post eg har vore på før, og no har eg kontroll :-)

13. - 14.: Nytt "slitestrekk", beste variant er nok høgre via veg.

14. - mål: OK

Fann greitt fram, men veldig tung i steget. Etterverknader etter førre vekes korona?

start - 1.: Overser at eg skal ein knekk opp ved startpost, for å kome inn på stien skrått oppover, og følger i staden etter samtidigstartande Marta Ulvensøen inn i det grøne. Rotar nok bort nærare halvminuttet her, før eg er oppe på stien? Det går deretter overraskande tungt oppover, og eg rundar litt meir enn det som var plan A, som var å dra nærare post 5.

1. - 2.: Nytt tungt strekk, eg trur eg skal løpe i fine "trøndermyrer", men det er både tungt og vått i overraskande høgt gras. Ligg også for langt nede på første del av strekket, og ingen opptur når eg blir nådd att av fleire av dei som starta bak meg i klassen, herunder Lars Roger Lundanes, som kjem dampande i myra til venstre for meg inn mot posten.

2. - 3. Litt for langt til venstre, og nokre sekund går sin veg også her.

3. - 5.: OK, og gammal "løpepåhøgde"-teknikk sit enno :-)

5. - 6.: Relativt ulendt på siste del av strekket, men har fokus mot vegetasjonsgrensa, og går greitt i posten.

6. - 7.: Har kontroll på "kvitt felt" på nase i myra etter bekken, og veit difor kvar eg treff vegen, og har grei kontroll opp mot posten.

7. - mål: OK, men med trist fart...

Veddemarka blir aldri noko favoritterreng, og dagens strategi var å løpe mest mogleg på sti, sjølv om mange av stiane er både og.

start - 1.: OK

1. - 2.: Veldig nølande, og får ikkje tak på kurvebiletet.

2. - 3.: Meiner eg veljer riktig her, men når eg aust for Gjølevatnet stoppar for å registrere StikkUt-kode, for så å kome på at eg korkje har med mobiltelefon eller noko å skrive med, og eg ikkje klarer å kome på ein hugseregel for koden, kan det kanskje lesast som om eg ikkje var heilt påskrudd til vidare O-verksemd i dag, etter 4 foregåande timar med EM-stafett?

3. - 4.: Er lojal mot strategien "mest mogleg på sti"...

4. - 5.: Katastrofestrekk... Der eg skal kutte mellom 2 stiar, treff eg på eit tråkk som eg oppfattar til å gå i nokon lunde korrekt retning, og eg legg i veg langs dette. Etter kvart veks mistanken om at eg ikkje er på den stien eg hadde tenkt, men håplaust at det tek så lang tid før eg konkluderar med at den mistanken faktisk stemmer, og at eg til og med er på feil side av Rotevatnet. Uff...
Strekket blir ikkje betre av at eg løper for langt på stien, etter om sider å ha funne den rette...
I alle fall 5 min. tidstap her, tenkjer eg :-(

5. - 6.: Finn ingen god trasé på første del av strekket.

6. - 7.: OK, sjølv om posten ikkje ligg i sadelen.

7. - mål: Løper på feil side av skulen, mål er ikkje midt i ringen, men i høgre kant, noko eg burde ha hugsa, eg såg jo målposten før eg starta...

Ny B-finale, nok ein gong med målsetjing om beste tredjedel, og klarar det nesten, med plassering som 27 av 76 startande. I sum greitt nøgd med meg sjølv i årets WMOC, når sesongen så langt har vore som den har vore.

start - 1.: Startar forsiktig i uoversiktleg terreng, men styrer med hjelp av kompass og myrene.

3. - 4.: Veljer venstre for haugen i staden for rett over. Finn OK traséar og trur at valet er OK.

6. - 7.: Skjønner lite av den gule korridoren (gammal kraftlinjetrasé?), men har grei kontroll heilt til eg får ein sving inne i ringen.

7. - 8.: Veljer høgre via sti, og trur valet eigentleg er greitt, men tapar tid på at eg ikkje finn det beste tråkket gjennom det grøne. I alle fall til venstre for meg var det eit vesentleg betre tråkk.

8. - 9.: Vurderer at det skal vere greitt å ta seg inn, og at det tek alt for lang tid å lese alt her, og legg av garde austover på kompasskurs. Planen om å ta seg inn fungerar, men så dummar eg meg ut etter å ha tatt meg inn, trur eg ser haugen før posten til høgre for meg, gløymer at eg har med kompass, og ser etter kvart at det lysnar foran meg inne frå det grøne. Då skjønner eg heldigvis kjapt kva eg har gjort, og kvar eg er, men eit par minutt (og 6 plassar på resultatlista...) sosast nok bort her...

10. - 11.: Rett på er nok kjappare enn min kurvevariant...

Målsetjinga ved start var plassering i beste tredjedel, eg klarar det nesten, med å bli nr. 29 av 80 startande. Utan rotet på 7. kunne det ha blitt 22. plass.

4:14 frå å løpe meg opp til A-finale i langdistansen. Heilt greitt at eg blei i B :-)

start - 1.: Litan sleiv inn mot posten, men ikkje snakk om mange sekund.

1. - 2.: Finske myrer er ikkje som vestlandske, men eg styrer meg greitt inn.

2. - 3.: Litt for langt til venstre, men skjønner kvar eg er.

3. - 4.: Usikker bortover her, men går heldigvis rett i.

5. - 6.: Hjelpekurver gjer at haugen ser verre ut enn det han faktisk er, og rett på er korrekt løysing.

6. - 7.: Finn ingen god trasé, og slit med glatte berg før eg går meg vill i det grøne, og i staden for med det same å dra rett ut til det gule for å ta meg inn, prøver å finne posten (eg trur jo eg er på rett stad...). Her går det nok med eit par minutt :-(

7. - 9.: Det er kø i passasjane både opp til og ned frå 8. Vanskeleg å forstå kvifor løypa er lagt slik, når deltakarane er gamle, og passasjane opp og ned er så trange...

9. - 10.: Planen er å kutte ut til traktorvegen, men eg kjem i staden på eit tråkk som eg føler går i rett retning, og det stemmer...

10. - 11.: Rundar til venstre, men blir stoppa av sperreband der eg vil inn mot vegen og det gule... Rett på over haugen, utan sperreband i vegen, er nok nokre sekund kjappare.

Godt nøgd med meg sjølv ut frå korleis vårsesongen var, faktisk berre 1:08 frå plass i A-finalen!

Ut frå "Model Event" hadde eg venta heilt anna terreng enn det som møtte oss ut frå start, med ein god del hogstnedfall og grums i botnen, men strekktidene tilseier at eg takla det rimeleg greitt.

1. - 2.: Beste trasé ligg nok eit par knepp til høgre.

2. - 3.: Usikker midtvegs, men tek meg inn utan stort tidstap.

4. - 5.: Bremsar opp når eg føler at eg har kome langt nok, og ser heldigvis posten til venstre for meg :-)

8. - 9.: Trang inngang til og utgang frå 8., og får smelt ei grein i trynet når eg prøver å vere høflig og slippe fram ei dame... Deretter veljer eg feil, finn ingen god trasé bortover lia, og er så usikker når eg endeleg møter slepet at eg drar ned for sjekk av kvar eg er... Med optimal gjennomføring her hadde det blitt A-finale...

9. - 10.: Sliten, og inn mot posten forstår eg lite av fargebruken på kartet, men går heldigvis rett i...

Også i finalen gjekk eg, for å spare beina til komande skogsløp. Nokre løpssteg blei lagt inn der det var grasunderlag.

Eg trur eg har korrekte vegval på alle strekk i ei ikkje alt for "avansert" løype.

Med usikre bein og prioritering av skog, gjekk eg gjennom kvalifiseringsløpet her, men med nokre løpssteg der det var grasunderlag.

Feil vegval til 12. (inga trapp på høgrevegvalet).

Hadde sett fram til tartan i oppløpet, men der var det asfalt...

Avrundar årets Fjord-O heilt greitt :-) Hadde ikkje vågd å tru for eit par veker sidan, at ting no skulle fungere så pass bra som det faktisk gjer :-)

start - 2.: OK, men får ei skikkeleg regnbyge i fleisen inn mot 2.

2. - 3.: Slit med å sjå kva eg driv på med i regnet, og tek det meir varsamt enn om sikten hadde vore OK.

3. - 4.: Slit fortsatt med å sjå, men tek meg heldigvis inn då eg er på veg inn ein "dal" eg ikkje skal inn i.

4. - 6.: OK

6. - 7.: Blir usikker her, når eg ser ein post som eg føler er litt for langt nede, men ser heldigvis min eigen før eg løper for langt.

7. - mål: OK, og særleg godt nøgd med at eg har betre inngangar enn dei som er rundt meg, og som løper frå meg på strekka, men likevel stemplar bak :-)

Godt nøgd også i dag, sjølv om eg legg att eit par dumme minutt, og særleg dumt er vegvalet frå 5. til 6. :-(

start - 1.: Veldig tungt oppover her...

1. - 2.: Fortsatt tungt, og kjem også for langt til høgre. Her går nok 20-30 sekund.

2. - 4.: OK

4. - 5.: Vegvalet følast feil undervegs, men gjennomgang i ettertid tilseier at det er heilt OK :-)

5. - 6.: Nytt vegval som følast feil undervegs, og som no også er feil. Beste må vere å runde til høgre, og om lag halde høgde.

6. - 8.: OK

8. - 9.: OK, sjølv om myra ned frå 8. langt frå er så farbar som eg trur ho skal vere.

9. - 10.: Grumsete inngang, beste inngang er nok litt lengre til venstre.

10. - 12.: OK, og 12. viser seg også å vere mål...

Sjølv om Lingafar slo tilbake i dag, er gubben strålande nøgd med at kroppen fungerte for andre dag på rad, og at det til og med gjorde mindre ondt i dag enn i går :-)

start - 1.: Tuete og ekkelt bortover her, og burde nok ha fulgt stien lengre før eg tok av mot venstre.

1. - 2.: Tungt opp her også, ja...

2. - 3.: Beste trasé må vere lengre til venstre. Eg veit kvar eg er oppover mot posten, men rundar for å spare ein sliten kropp for klatring.

3. - 4.: Endeleg nedover, og så er det nok kjappare med rett på enn å dra bortom stien.

4. - 5.: Finn ingen god trasé her.

5. - 6.: Forkastar høgre, og trur eg finn den rette traséen via Øvre Fanaløype.

6. - 7.: OK

7. - 8.: Vurderar også rett på, men strekktidene tyder på at valet mitt er OK.

8. - mål: OK, og blir ropt i mål av speaker som leiar i klassen, utan at speaker legg til at eg også var den første på startlista.

Godt nøgd med 5.plass i H65- i enkel "løpeløype" :-) , når vårsesongen har vore slik han har vore, og enda meir nøgd med at eg når eg skriv dette nokre timar etter løpet, ikkje har særleg ondt i korkje høgre kne eller venstre lyske :-)

Første gang i startbås på 70 dagar, utan stavar til å støtte meg på, og med plan om å løpe så mykje eg orka. Det gjekk langt betre enn frykta, litt ondt her og der etterpå, og så får morgondagen gi fasiten på om kroppen tålte forsøket.

Farta var så som så, men det skadar jo ikkje å vere kjent i terrenget :-)

start - 1.: Ser ikkje startposten, og løper litt for langt på "stien" før eg tek opp mot venstre.

1. - 4.: OK

4. - 5.: Optimal trasé er truleg eit knepp meir til venstre.

5. - 6.: Veljer sikker inngang framfor den hårfint kjappare rett på.

6. - 7.: Med velfungerande bein hadde eg nok tatt venstre via Grindåsvegen, no tek eg i staden høgre via Nedre Fanaløype, og det er faktisk fullt mogleg at det var det beste vegvalet :-)

7. - 8.: Legg meg høgt for å sjå posten frå oppsida, men det er så tett skog at eg ser null og niks, men eg har bra kontroll på når eg er kome langt nok til ikkje å fortsetje for langt.

8. - 9.: Beste trasé er nok litt lavare nede.

9. - 10.: Her veit eg frå gammalt av at det berre er å dra på :-)

10. - 11.: OK

11. - 12.: Er heilt bevisst på å dra rundt til høgre på siste del av strekket, og strekktidene viser at valet var korrekt. Fleirtalet klatra nok over haugen, etter først å ha tatt ned på Grindåsvegen for tidleg.

12. - mål: OK, og rimeleg overraska når eg får strekktidslappen, og ser kor nær eg er førstemann...

Kropp i stadig betring, og i dag blei det stavjogg over dei våte myrene, og stavgang elles. Brikke og kompass blei lagt i lomma, brikke tatt fram på postane, og kompass i starten av eit par strekk.

start - 1.: Finn ein grei trasé bortover lia, men optimal trasé er nok eit hakk meir til venstre.

1. - 2.: Litt ruglete botn i starten av strekket, og eg drar via myra for å få fin botn tilpassa mitt noverande steg.

2. - 3.: Passerar rett på nedsida av posten utan å sjå korkje post eller stein, men skjønner fort at eg har kome for langt og at eg er litt for lavt.

3. - 4.: Post litt lengre til venstre enn venta ut frå det eg les som myrkontur.

4. - 6.: OK

6. - 7.: I etterpåklokskap drar eg opp for tidleg...
Eg ser stupet til høgre, føler eg har kontroll på blokkfeltet i postringen, men passerar likevel forbi på nedsida av posten, utan å sjå korkje post eller stein. Brukar deretter alt for lang tid på å skjønne at eg har kome for langt, og ta meg inn, og finn samstundes ingen god trasé langs lia her, korkje den eine eller andre vegen.
Kort og godt feil inngang, og deretter sløv oppførsle, kanskje fordi fokus akkurat no er meir på å ta vare på kroppen enn å kome seg fort rundt?

7. - 8.: Prøver å finne trasé langs mest mogleg myr, der eg får til å ta joggesteg. Løysinga følast grei, men det er kanskje betre å slippe seg ned med det same, og runde langs stormyra til venstre?

8. - mål: OK

Går fortsatt med stavar, men om eg forstår konseptet for Emblem IL sin klubbmeisterskap korrekt, skal "løpstida" (i mitt tilfelle gangtida...) kvernast gjennom ein formel som tek omsyn til både kjøn, alder, vekt og syn, og om formelen då også tek omsyn til dårleg kne og tilhøyrande stavgang, kan det jo vere at eg avanserar ein del oppover på den offisielle resultatlista, når denne kjem, men tidsmessig var det, som rett og rimeleg er, mange som var foran meg.

start - 1.: OK, og eg føler at kartet stemmer like dårleg no, som sist eg var på den same steinen, det manglar minst ei hjelpekurve her...

1. - 2.: OK

2. - 3.: OK, og over myra midtvegs prøver eg meg til og med på nokre veldig varsame joggesteg, utan at kneet protesterar :-)

3. - 4.: Har tenkt meg ned på sti og jorde, men treff på ein grei sti som ikkje står på kartet, og veljer i staden denne. Stien seier etter kvart takk for seg, og eg burde nok ha dratt ned. Inn mot 4. blokkerar eg passasjen etter steingarden for Emma2, som blir slått med 3 sek. av Emma1, og eg tek gjennom blokkeringa ansvar for desse 3 sekunda. Emma2 hadde ingen grunn til å tru at eg brått skulle stoppe på den smalaste staden for å sjå meg ut den beste traséen vidare, og når dama er så lettbeint at eg ikkje høyrer ho kome...

4. - 5.: OK

5. - 6.: Eg drar opp litt for tidleg, og får ikkje tak på noko som helst, men forstår at eg er for langt aust, og ser lyset når eg om sider forstår kva det er eg ser etter...

6. - 7.: OK

7. - 8.: Her var det bratt, og eg listar meg varsamt nedover utan feilsteg, med god vekt på stavane :-)

8. - 9.: Finn ein passe flat og ikkje minst mjuk trasé bortover lia, og held på denne, sjølv om det sikkert er kjappare å dra ned på vegen. Ingen bom på 9., svingen er ein konsekvens av at eg ser ein fin og slak "nedgang".

9. - 10.: Midtvegs på strekket er det ein mur som ikkje framgår av kartet, og eg må eit stykke til venstre for å kome meg over denne på ein stad der han er lav nok til at eg får løfta med meg høgrefoten...

10. - mål: OK, og godt nøgd med at kneet klart virkar å vere i betring :-) Kanskje prøve jogge-/løpssteg i større volum neste veke?

Ikkje enkelt å få flyt når eg pr. no går med stavar, men eg klarer jo heldigvis å ta meg inn når eg stoppar for å løfte opp kartet, og lese... Elles er jo stavgang også ein slags trening i "karthusk" :-)

start - 1.: Følger passe sløvt merking ut frå start, og er "brått" på feil post før eg startar å lese kartet...

1. - 3.: OK

3. - 4.: Jungel/grastuer og stavar er ein dårleg kombinasjon, og så var det noko rart med gjerdet der eg kryssa stien, utan å leite fram kompasset (skulle gjerne ha hatt fire hender på dagar som i dag...). Eg lurar på om gjerdet "knekker" langs stien, og var med på å føre meg på ville vegar? Det hadde nok uansett lønt seg å dra rett tilbake til stien ut frå 3.?

4. - 9.: OK, til og med med tendensar til flyt, og ufatteleg gode strekktidsplasseringar ift korleis helsetilstanden er, her må mange ha gjort mykje rart...

9. - 10.: Føler at inngangen er gjennom ein hage, der det i alle fall er utplassert både trampoline og anna på velstelt grasplen...

10. - 11.: Får ikkje tak på grensa mellom hagegrønt og gult, eg vil ikkje inn i hagegrønt, og drar ikkje bort på vegen.

11. - mål: Blir knust av Bjørn Sandvik i den interne klubbkampen her...

Fortsatt ikkje løpbar, men gjekk meg ein grei trenings-/luftetur i B-løypa :-)

start - 1.: Stussa på at det var så langt fram til posten, det kunne nok godt ha vore nokre hjelpekurver på kollene på begge sider her.

1. - 3.: OK

3. - 4.: Forlot høgspentgata på ein grumsete stad...

4. - 5.: Hadde eg vore løpbar, hadde eg vald rett på, og det burde eg nok også ha gjort sjølv om eg gjekk "stavgang". Linja opp til vegen var eit helvete, med masse dritt på tvers...
Seinare forlet eg vegen for seint, eg meinte eg hugsa at det var ein sti inn til venstre her, men det var det ikkje...

5. - 6.: Silketerreng :-)

6. - 7.: Slutt på silken...

7. - 8.: Sjølve posten er jungelpost, men grei å finne.

8. - 9.: Her har eg ufatteleg god strekktidsplassering, det er nok mange som går seg fast i grønt ut frå posten, i staden for som eg å gå gjennom det kvite kortaste veg til sti.

9. - mål: Går ikkje i 100-fella i siste stikryss, men sjekkar kartet samstundes som eg stemplar på 100, og så veit eg jo uansett at mål er lengre nede, det er jo eg som utplasserte målbukkane eit par timar tidlegare...

Med rustent kne gjekk eg meg ein rusletur med stavar, og som venta blei eg ikkje sist...

Ingen bom på 4., men eg gjekk bortom ein turorienteringspost som eg såg :-)

Stien vest for 5. (ned til sørenden av vatnet) har eg prøvd tidlegare, og konklusjonen var at rusten gubbe med stavar og dårleg kne hadde null og niks ned den stien å gjere...

Generelt hadde eg nok vald meir rett på om det hadde vore fart i meg, men med stavar er det greitt å gå på sti utan rusk og rask som stavane heng seg fast i.

Med dårleg kne blei det B også denne gongen, diverre med klassesiger i H60-B som resultat. Det var ikkje på nokon måte planen, men når dårleg/middels fart koplast med solid rutine (og så skadar det jo ikkje å vere relativt lommekjend i terrenget...)...

start - 1.: OK.

1. - 2.: Utgang til høgre må vere kjappare, elles OK.

2. - 3.: Går meg fast i vindfall ut av 2., og så tek eg av for tidleg frå stien opp mot 3.

3. - 4.: OK.

4. - 5.: Vurderar stor venstresving som opplagt raskast, men vurderar likevel også rett på for å spare kneet. Det er fullt mogleg at eg kjem til å angre på valet, som endte opp med stor venstresving...

5. - 6.: OK, eg trur ikkje det er kjappare å slippe seg ned på vegen.

6. - 7.: Heller ikkje her trur eg det er kjappare å slippe seg ned på vegen, men eg kjem litt for lavt mot barnehagegjerdet. Elles OK.

7. - mål: OK.

Ondt i kneet etterpå, undrast på korleis det er i morgon...

Med eit kraftig murrande kne, tok eg det pent i B i bedriftssesongopninga. Eg kom meg rundt, og kneet blei ikkje verre av økta :-)

1. - 2.: Har på mystisk vis fått det for meg at eg skal til skrent, og først når skrenten er utforska som postlaus, sjekkar eg postbeskrivelsen...

5. - 6.: Endeleg eit strekk med litt nedoverbakke :-)

8. - 9.: Blingsar på stien, dagens største tidstap...

12. - 13.: Tungt og treigt opp mot posten...

Forsiktig jogg i sprint, i eit bustadområde eg aldri tidlegare har vore inne i...

Kartet har forbetringspotensiale m.a. ved post 10, der eg ut frå posten gjekk meg fast i skrent/kratt.

Spenning før finaleløpet, ville vi bli sendt opp i like håplause steinhaugar som dagen før, og ville kroppen tåle 4 løp på 4 dagar?

start - 3.: OK

3. - 4.: Planen er inngang frå høgre, der det ser ut til å vere ein OK passasje. Eg gjennomfører vegvalet som planlagt, men passasjen opp mot steinhaugen er alt anna enn OK, det er med naud og neppe eg kjem meg opp. Når eg har kome meg opp, gløymer eg det brune, kjem i feil "sprekk", og passerar 15 meter til høgre for posten, og brukar deretter alt for lang tid til å forstå kva eg har gjort...

4. - 5.: Gløymer kompasset, og "løper" mot feil steinkoloss. Totalt søler eg bort om lag 5 minutt oppe i haugen her, på leiting etter 4. og 5. :-(

5. - 6.: Grusom trasé ned frå posten, og rotar meg deretter borti både kratt og piggtråd, beste vegval må vere lengre til venstre, der det visstnok også var ein sti.

6. - 7.: Lar meg heldigvis ikkje knekke av dei siste strekka, og veljer rett her. Interessant nok har eg då eg kjem i mål, beste strekktid av dei 18 som då er inne :-)

7. - 8.: OK, hovudutfordringa er nok ein gong piggtråd...

8. - 9.: Nok ein gong helvetespassasje ned frå posten, men strekktidene tyder på at eg har vald rett :-)

9. - 14.: OK

14. - 15.: Ser heldigvis gjerdeopninga før eg har klatra for langt oppover :-)

15. - mål: OK, sliten og nøgd, og blir overraskande, særleg etter trøbbelet eg hadde lengst sør, snakka i mål av speaker, som nr. 2 i klassen :-)

Godt nøgd med meg sjølv etter 4 løp, og samanlagt nr. 16 av 108 i H65- :-)
Ein del bomming var det, men eg trur ikkje det var mange som bomma mindre enn meg...

Etter 2 kalde og fuktige dagar, var det plutseleg 2-sifra temperatur og finever, så ulltrøya blei lagt vekk...

start - 1.: Ser plutseleg ei tjørn foran meg, men skjønner at nokre fuktige dagar har gjort noko med terrenget, og tek meg greitt inn.

1. - 2.: OK

2. - 3.: Har bestemt meg for høgrevegval, men ned frå posten står det ein annan løpar og ropar at det ikkje er mogleg å kome seg ned det skrå og glatte berget der, og då endrar eg til venstre. Inn mot posten finn eg ingen passasje, sjølv om eg veit kvar eg er, det er kantar og bratte skråberg overalt rundt meg... Mistar fleire minutt her, men utan at eg eigentleg vil kalle det for bom...

3. - 4.: OK, men forbannar piggtråd både før og etter vegen. Før vegen hjelper eg ei svensk dame som ligg foran meg under ein piggtråd ved å løfte denne opp, når eg så forventar at ho deretter skal hjelpe meg under den same piggtråden, seier ho "Tack", og løper sin veg... Etter vegen ender eg opp inne i eit "ekstra" piggtrådgjerde som går rundt dammen...

4. - 6.: OK

6. - 7.: OK, men det er så vidt eg klarer å kome meg opp det trange "søkket" inn mot posten.

7. - 8.: OK, men terrenget er langt mindre farbart enn kva kartet gir inntrykk av.

8. - 9.: OK vegval, men posten er dumt plassert, i eit område der det er berre sprekker mellom ulike steinkolossar, utan at det er farbart mellom desse slik som kartet gir inntrykk av. Eg kjem meg ikkje opp den sprekka som posten ligg i, men må tilbake og rundt ein steinkoloss.

9. - 10.: Gløymer kompasset, tek meg greitt inn, men går meg fast i skråberg når eg skal ned mot posten...

10. - 11.: Får ein dårleg inngang, med klatring opp og ned skråberg...

11. - 12.: Forstår ikkje vegetasjonsgrensa på posten, men eg veit jo kvar eg er...

12. - mål: OK

Greitt nøgd med meg sjølv, men tenkjer at dette var eit terreng som absolutt ikkje burde ha vore brukt til eit løp med så mange veteranar :-(
Deler av terrenget har elendig framkomst, og kartet viser passasjar som i praksis ikkje er passasjar for slike som meg, og slett ikkje for dei som er eldre og/eller enda meir skrøpelege...

Lærte ein del om kart, terreng, steingardar, skog og piggtråd dagen før, og hadde god nytte av dette på løp 2 :-)

start - 4.: OK

4. - 5.: Ser ingen gode "rundt"-variantar, og veljer tilnærma rett på. Ein del piggtråd og eit par "oppgåtte" beitemarker, men eg trur at vegvalet er OK.

5. - 6.: Høgresving (rett nord ut av 5.) er truleg kjappare?

6. - 7.: OK

7. - 8.: Her går eg meg fast i "skråberg" fleire stader, og beste vegval er nok lengre til venstre.

8. - 9.: Brukar halvminuttet på å kome meg over eit piggtrådgjerde litt over midtvegs.

9. - 11.: OK

11. - 12.: Heng fast i piggtråd like før drikkestasjonen, men blir berga av ei italiensk dame som løftar opp piggtråden som heng fast i ryggen, samstundes som eg sjølv jobbar med piggtråden som heng fast i skrittet...
Strekket framstår elles som eit meiningslaust langstrekk, heilt utan vegvalsalternativer :-(

12. - 14.: OK

14. - 15.: Same strekk som dagen før, og eg hugsar at eg ikkje skal ta venstre ein gong til :-)

15. - mål: OK

Godt nøgd med både tid, plassering og meg sjølv :-)

Portugal 4-dagars var i mange år eit årvisst reisemål, men av ulike grunnar har eg no ikkje vore med sidan 2020, men det var godt å vere tilbake, om enn ikkje til sommarver, men heller ikkje å forvente, når langt nord i landet, og på mellom 700 og 800 moh.

start - 1.: Den umiddelbare strategien var å lese og orientere etter steingardar, men eg forkasta fort denne strategien, då eg skjønte at det var langt fleire steingardliknande konstruksjonar i terrenget enn dei som var på kartet. Kom skeivt, men las meg heldigvis greitt inn på det brune, samstundes som eg konkluderte med at kompasset var ein sikrare ven enn steingardane, og at "kvit skog" ikkje var skog, men noko anna...

1. - 4.: OK

4. - 5.: Forstår ikkje skilnaden på "kvit skog" og "grøn skog", og blir lurt av nokre steingard-/gjerdeliknande greier til å tru at eg er lengre til venstre enn kva eg er. Her går det nok over eitt minutt.

5. - 8.: OK, om enn med nokre utfordrande piggtrådpasseringar...

8. - 9.: Her gløymer eg å lese det brune, og kjem for langt til høgre... 2 nye bomminutt...

9. - 11.: OK

11. - 12.: Blir nok ein gong lurt av steingardar som ikkje står på kartet, gløymer at kompasset er ein god ven, og ser ikkje det brune godt nok under det svarte... 2 nye bomminutt...

12. - 15.: OK

15. - 16.: Havnar i ei steinrøys inn mot posten

16. - mål: OK

Overraska når eg ser resultatlista, med meir enn 5 minutt bom trudde eg at eg skulle vere lengre nede på denne enn kva eg faktisk er.